巷仔內

Open Now

Now Closed

之前俾正宗台灣人主理既台灣菜【巷仔內】既炸全雞洗版，所以最近就同朋友去左試下。位置相當方便、觀塘地鐵站步行一分鐘就到。最重要係價格實惠、地方寬敞舒服。Lunch 同tea time叫主食送一杯飲料、4點後免費任飲冬瓜茶同綠茶！蒜味香腸：每次必點台灣小食、炭烤香氣超濃郁，蒜味爆香，咬落去油脂滲出，配埋生蒜片一齊食，鹹香惹味。巨無霸排骨魯肉飯：排骨大塊到誇張！炸到金黃酥脆，肉質鬆化唔油膩。魯肉飯肥瘦均勻，醬汁滷得入味，撈飯食真係停唔到口。塔香鹽酥雞：外皮炸到超脆，九層塔香氣撲鼻，雞肉嫩滑多汁，椒鹽調味啱啱好。滷味三選麵：可以自選麵食同配料，我就選擇左關廟陽春麵、甜不辣、百頁豆腐同花枝丸。關廟麵彈牙有咬口，滷汁香甜唔死鹹。甜不辣Q彈、百頁豆腐吸晒滷汁精華，花枝丸鮮味十足！手撕巨無霸炸全雞：即叫即炸，上枱熱辣辣！外皮脆到「咔嚓」聲，雞肉鮮嫩爆汁，連雞胸都完全唔柴，撕開仲有肉汁流出黎～本身就用左椒鹽調味，風味更上一層樓！炸全雞有生日配套服務、可以同餐廳預定安排（需要五天前預約）。仲有大胃王挑戰【金雞下蛋】、包括全雞+4隻半蛋+切片豬排，有興趣同有實力既朋友可以去試下。