香港人冰室

Open Now

Now Closed

趁最後一晚堂食，今晚同朋友去咗呢間茶餐廳食最後晚飯，一去到已經見到入邊坐滿客人，心諗呢間茶餐廳應該非常好食，之後坐低睇吓餐牌，發現有好多唔同款式嘅中式菜式，例如有啫啫雞煲、蒸水蛋、蒸肉餅、椒鹽各樣各樣，而我覺得最能夠試到餐廳有冇鑊氣，莫過於試吓佢個豉椒炒蜆，佢個豉椒炒蜆非常之有鑊氣，而且每粒蜆肉都非常鮮甜，仲要非常足料，之後我哋嗌左支竹牛腩煲，個牛腩煲一開蓋就見到卜卜卜卜，就知佢係即場叫即場整出嚟，熱辣辣嘅牛腩煲，再加埋佢嘅牛腩炆得非常之冧，拎嚟送飯簡直一流，我呢啲食肉獸，一個牛腩煲梗係唔夠啦，我仲叫咗一個三杯雞煲，呢個三杯雞煲，佢個汁整得好好食，再加埋佢啲雞非常鮮嫩，又係一個送飯嘅好餸，食完佢嘅中式菜式，梗係要試埋佢嘅炒粉麵類啦，我哋就叫咗一個瑤柱金銀蛋炒飯，呢個炒飯炒得有鑊氣又唔油，每粒飯都炒得煙煙韌韌，而且瑤柱十足，講完食物到嘢飲，佢嘅紅豆冰好足料，好多紅豆而且又唔會太過甜，啱晒我口味，總括而言，餐廳款式繁多，價錢合理，最重要係每一款菜都非常之有鑊氣，經過可以一試。