越北牛肉粉專門店 (Closed)

黎到呢間沙田既越北，一間好有越南風味既餐廳，裝修格局都好越式，都幾正宗既越南美食。最緊要係環境乾淨又衛生，座位又夠曬闊，坐得舒舒服服咁食，真係幾開心。叫左個馬拉盞炒通菜，味道幾惹味，而且係偏甜味，岩曬鐘意甜食既朋友仔，份量都唔少，有大半斤左右，通菜炒到岩岩好斷生，夠曬脆綠爽口。叫左個牛湯河，牛丸夠曬彈牙，食落好新鮮好有牛味，牛肉熟度岩岩好，而且湯汁夠曬清，正所謂正湯牛河，先可以突顯到牛既鮮味。另一個叫左個雞扒湯濛，湯濛掛湯力一流，食落好有口感，d汁酸酸甜甜咁，夠曬開胃，雞扒大大份，板脆肉嫩，食落好有口感，好有雞味。小食方面，本人最愛就係個春卷，食落好香口，而且夠曬脆同乾身，似係岩岩炸起，食落好過癮。