最近同屋企人去開尖沙咀行街，行到餓餓地想搵間舒服既地方坐低食餐好既，上網見到呢間「福彩皇宴」原來已經開左成 10 年咁耐！見佢做緊 10 周年慶祝，午市時段（星期一至五早上 11 點至 3 點）竟然全單有 88 折，咁吸引既優惠真係無理由吾去幫襯下，即刻決定上去歎返一盅兩件！🥢
.
坐低第一時間叫左個鮮蝦腐皮卷 ($41)。一上枱熱辣辣，腐皮炸到金黃色超級酥脆，咬落去聲都聽得到！入面餡料好足，除左爽口彈牙既鮮蝦，仲有紅蘿蔔絲同芹菜，食落去口感豐富又有層次，完全吾會覺得油膩，真心推介！🦐
.
跟住黎既係鮮蝦菜苗餃 ($41)。個皮晶莹剔透，睇落已經好開胃。咬開入面d菜苗好翠綠好新鮮，配埋鮮甜既蝦肉，味道好清新，完全帶出左食材本身既鮮味，感覺好健康，食多兩籠都吾怕滯！🥟
.
之後呢個真係有惊喜，櫻花蝦鹹水角 ($29)！平時鹹水角就食得多，但加入櫻花蝦元素既鹹水角真係第一次見！外皮炸得岩岩好，煙煙韌韌，最正係食落真係有陣陣櫻花蝦既鹹香味，將成個鹹水角既味道昇華左去另一個層次，創意滿分！🌸
.
同樣係櫻花蝦系列，我地仲叫左櫻花蝦蘿蔔絲酥 ($32)。個酥皮整得好鬆化，一層層咁好靚。一咬開，入面係滿滿既蘿蔔絲餡，而且保持到好濕潤多汁，蘿蔔既清甜加埋櫻花蝦既鮮香，熱辣辣食真係好正，小心燙口呀！🥕
.
飲茶點少得粉果？呢度既真功夫潮州蒸粉果 ($37)真係名副其實有真功夫。最重要係個粉果皮好薄，晶瑩剔透咁，吾會食到成口粉。入面餡料好多，有花生、韭菜、粉葛粒，咬落去又香又爽口，口感好豐富，每一啖都係滿足感！🥜
.
最後叫左個午市孖寶套餐 ($148)填飽個肚，真心覺得個套餐好抵食！有齊香芋臘味粒炒飯同叉燒皇。個炒飯炒得好有鑊氣，粒粒分明，入面有雞蛋花、香蔥，仲有勁多臘味粒同香芋粒，每一啖都好香口。而個叉燒皇真係一大碟，份量十足，肉質軟腍入味，蜜汁味岩岩好，講真好食過一般燒味舖好多！🍚🍖
