老掌櫃東北菜館 (海之戀商場)

Open Now

Now Closed

喺荃灣行完Donki，正要物色晚飯地點，諗起家姐之前曾經推介過Donki門口轉角嘅呢間東北菜館，由於位置唔起眼，一直都冇留意到佢，擇日不如撞日，決定喺度食埋晚飯。豬耳整成果凍狀再切片，巧手精緻，入口口感爽脆，膠質豐富而且一啲都唔油膩，令人食完一片又一片，非常開胃。口水雞肉質嫩滑，醬汁味道層次豐富，鮮香麻辣，非常惹味。土豆燒牛肉以煲仔上，份量好足，牛肉夠哂腍，薯仔亦夠軟身，加上香濃嘅湯汁餸飯一流。蔥爆牛肉大大碟，而且牛肉大大片，份量亦算多，軟腍入味，同樣係白飯殺手。白菜嫩豆腐家鄉味濃，冇過多嘅調味，湯浸旺菜配上嫩滑嘅豆腐，連湯都可以飲埋，清甜舒服。酸辣湯酸度辣度都好夠，鮮香醒胃，而且份量亦好大，三四個人分享都唔係問題。秘製牛犇麵湯底香濃之餘，麵條爽滑彈牙，加上牛肉嘅份量俾得相當大方，而且煮得酥軟入味，價錢亦超抵，性價比極高，喺一致認為最推薦嘅一道！東北農家炒飯配搭簡單，但炒得非常乾爽，而且好有鑊氣，味道亦唔錯。自家製豆漿味道較淡，但勝在低糖，係健康之選。大商場裏面都食到地道風味嘅小炒，實在係非常有驚喜，雖然匿埋喺商場嘅小角落，但勝在環境舒適，食物質素唔錯，而且性價比高，相信會成為常客。