Krebs的個人專頁

一眾4人老友聚，剛開業黎一試。重中之重嘅海鮮算新鮮，推介蟹，有膏實肉、甜；大蜆，有肉、甜；鮑魚新鮮有口感；大頭蝦冇特別，基圍蝦無試；海螺冇特別。反而脆肉鯇同埋 即取嘅生蠔（好似話係台山蠔） 正，絕對要食。雖然好似冇咩其他人拎，但我好撐場，拎左3，4次😋😋其餘丸類食品冇拎過，我地呢啲中佬冇以前咁食得，好少食呢啲，蔬菜類好新鮮，呢啲就有拎到。燒生蠔熟度剛好，都有啲質素，可惜嘅係無燒鱔嘅🥲熟食區冇咩吸引，相都無影到，最想食嘅燒榴槤好早就無晒，我食左一半時間去拎已無。甜品有試到，不過冇乜特別有驚喜。即整疏乎厘，格仔餅嗰啲，排條隊好長，要食的話都幾嘥時間，所以我又冇食到。整體，海鮮係OK嘅，但係食物嘅類型真係唔夠多，飲品區選擇亦都唔夠多，最後收枱時間係非常之準時。呢個價錢嚟講，合格中規中矩囉。Btw，環境地方就真係幾靚㗎喎，要讚👍…查看更多

生日慶祝同老婆喺度撐枱腳，試咗人均698嘅Set. 另外再加咗蠔，蠔好新鮮，有海水味但唔算重，配當晚house white wine好正，事後特登問番枝白酒名自己買番😋淺漬油甘魚，魚生好新鮮，配汁相當美味.三黃雞肉卷，唔算太有驚艷，嫩口.深海白鱈魚，好好味，魚味重，層皮做到少硬加脆係我最喜歡嘅一點，增補番魚肉口感淋呢方面.M7和牛後腰脊肉，最晚最出色，呢個部位我一定會叫三成，黎到剛好，肉味濃甜，完全無渣，口感smooth. 亦係今晚本身最期待，結果好滿意.餐廳服務方面絕對要讚，幾位招待嘅同事都好有禮，特別要一讚女職員Sanny，全晚招待很好之餘，老婆影相嘅時候好配合佢嘅儀式感😂幫我哋揸機影相角度好靚。感受到佢好有心從事佢嘅工作，讚👍好，希望飲食業有多啲呢啲職員。…查看更多

佐敦一帶一向都有好多好嘢食，而呢一間米線係其中一間我嘅飯堂。 平時黎到大多數叫佢嘅撈米線，雖相相中呢次我叫左湯米線🤣 但啲餸都係一樣架姐。亦試過撈薯粉，不過發覺食唔晒，咬到最後牙都軟。通常你呢啲小店，配菜方面我一般都會order一啲自家製嘅食品，入貨類型嘅我一律不試，即係簡單講啲咩丸咩丸之類😂所以我發覺黎黎去去我都係嗌 豬頸肉，豬軟骨，雞翼，牛腩，豬肚，豬耳，呢啲類型。最推介嘅一定係豬頸肉同埋豬軟骨，炆得好入味，夠晒腍。同埋最推介真係呢度嘅撈米線，呢度嘅肉醬係我食過最好食，好香偏甜味，啱晒我。…查看更多

做完運動，同朋友食個健康餐。呢個dish 主要係南瓜無花果牛油果配牛柳。用咗好多新鮮食材，而且用料好豐富，全部都係健康元素啊。日本蛋生熟整得剛剛好，輕流心，我最鍾意嘅狀態。牛柳亦都相當合格，熟度剛好，有牛味。…查看更多

龍亭鐵板燒喺佐敦寧波街，係一間日式鐵板燒餐廳。每次經過見到都覺得佢外觀好隱蔽，大門都要留意先見到。感覺好神秘，難得嘅機會，同老婆一齊慶祝週年紀念日，享受浪漫嘅二人世界。佢哋有廚師推薦同埋單點選擇，價錢都有平有貴，但比其他鐵板燒店平好多！老婆鍾意浪漫所以揀咗呢個地方好啱！我哋揀咗廚師推薦套餐價錢係$588同$788仲加埋兩杯啤酒。前菜係沙律配魚子醬煙三文魚同意大利柚子醋，好開胃🤤仲有一款燉蛋，食起嚟好似豆腐咁滑嫩。海鮮方面，新鮮程度一流，我哋揀咗鮑魚、扇貝、帶子同煆，扇貝配味牛油同黑松露汁，好入味。鮑魚都好鮮甜，一點都唔馬虎。然後係肉類，揀咗澳洲牛柳配蒜片、自家磨嘅wasabi，而且蒜片炸得香脆，我叫咗7成熟，完全啱入口，好出色！我哋仲加購左生蠔$5/隻，海味濃郁又鮮甜，口感享受😋最後係炒飯同今日甜品「雪糕」，炒飯炒得香口，飯粒鬆軟，每一啖都有特別嘅炭火香氣。總括嚟講，龍亭鐵板燒係一個值得試試嘅餐廳。食物質素好唔錯，價錢亦都相宜。…查看更多

同屋企人一行十二人揸車嚟西貢玩完順便夜晚食飯，事先訂好咗位。黎到嘅時間大約下晝6點鐘，黃昏時間，因為呢一日天氣唔熱，所以向店員要求坐室外。生蝦刺身係我全餐飯覺得最好食嘅道菜，所以encore咗一轉。口感好彈牙，配搭嘅汁水亦都好開胃好好食，連老婆都食得出話啲蝦好新鮮，同埋我覺得比較同平時喺泰國餐廳食唔同嘅一樣嘢就係個口感好厚身，所以食落口咬都幾下覺得幾creamy.呢個燒牛肉，中規中矩。椰汁飯亦都係冇乜驚喜，事關食得出入邊啲海鮮冇事前醃製過，當然明白本身呢啲都一定係啲急凍食材，但如果有醃製過，食落會好啲。*****. 一行12個人食咗$2500左右，但係坦白講成餐飯，滿意嘅嘢唔多，因此其實都冇影晒全部嘅相，只係因為醒起呢度嘅服務員水準好參差。有啲後生嘅都幾殷勤，反而有個年長小小嘅又未去到阿叔嘅，就服務態度好差，完全係街邊茶記嘅水準，所以先忍唔住得三張相都要寫返個食評。…查看更多

閑時經過見到呢啲食特色嘢嘅忍唔住入去試吓。羊腩河食到一半先醒起不如食個食評，中上水平。呢個涼拌兩味好好食，兩款都好食，皮蛋口感好黏口，所以食落口將嗰種川味嘅香辣味一路黏住，好香，特別要稱讚一下個木耳，試過呢個就知道完勝譚仔。個人覺得嚟到呢間餐廳一定要食。原本對呢個好有期待，最後來到有覺得中挺水平，主要係因為有少少鞋口，但係你話好鞋又不是，反而用嚟配搭嘅汁水都可以。整體而言，中挺水平啦，環境算乾淨。…查看更多

semi-buffet黎講算中水平，主菜叫左海南雞飯同埋牛肉餡餅。呢個唔知係風味問題定係真係麻麻哋🥹我就覺得唔係咁啱食。海南雞質素一般，咁喺樂園入邊食又無話有好高期待嘅，不過不失，反而個飯軟身得黎唔會冇晒口感，好食既。沙律菜三種都一般。呢一個嘅Parma Ham，幾有質素。但係配搭嚟講就冇乜特別，只係ham話質素幾好。最後冷盤方面只係兩種，但係就兩款都有驚喜，凍蝦好彈牙爽甜，青口海水味重，明顯兩種食材都係好新鮮，雞尾酒汁值得推介，好好食，比一般食生蠔嘅汁更勝一籌。最後飲品方面最右手邊呢款芝士乳酪幾好飲。重點係口感算係稀，唔會飲到你好飽。******. 食完晚飯之後套餐仲包括迪士尼煙花表演前排位置，今日講成個package咁樣又都算不錯嘅。Btw，個煙花喺前排睇原來真係好好睇😍****** 另外餐廳嘅環境同服務就真係冇得彈，特別想稱讚吓侍應嘅服務👍…查看更多

大半年前食過一次覺得幾好食，今日經過特登再嚟試吓。質素依然幾好，今次冇加錢轉雞髀，但肉質依然嫩滑，海南雞夠雞味👍唔係講笑，有啲餐廳既海南雞真係色水好靚但食落一啲雞味都無😓另外見到皮下啲脂肪呈現啫喱狀，我覺得呢啲先係海南雞合格嘅表現。三款醬汁都好味。自問唔係食家，唔敢講個例湯咩有無味精之類既說話，但至少我飲完唔會點口乾，味道都幾清甜，幾好。縱觀而言， $60午餐咁既質素，我覺得合格滿意。下次再經過都會再食。👍👍👍希望繼續保持到水準！…查看更多

因今日10個家庭成員食飯，諗住食海鮮加工，搵一間酒樓坐得舒服啲。乳豬不過不失，剛剛合格水平。正常急涷蝦水平，芡汁開得太稀。條黃皮老虎斑4斤係街市買千一蚊，拎黎加工，最後廚房師傅連洗都洗得唔乾淨，魚鱗都冇再幫我清乾淨啲，搞到蒸頭腩有啲腥腥地🫠另外炒球做得都唔好，魚肉散散地，落味又重手左。蒸得過熟😓呢個做得幾好，酒味夠，好香，剛好熟。呢個雞又反而整得幾好食，夠味剛好熟，食落肉質口感好！整體而言，雖然加工費算便，餐廳服務又幾好，但外來海鮮煮功唔得，諗住近海鮮街市，加上大酒樓，應該都穩陣，結果有啲失望。…查看更多

食鐵板燒嘅好處：有表演睇，有好Nice嘅廚師同你傾下計講解下食材、出品！前菜係黑醋汁沙律，菠蘿、龍珠果同沙律菜都好新鮮，配搭我最鍾意嘅黑醋汁，好開胃！吞拿魚食落唔會有渣，鮮甜，高質食材👍溫泉蛋溫泉蛋生熟程度剛好，蛋色有dd近紅色，一睇就知道必然係日本出產，蛋味好濃😋海鮮我地揀左 帶子、大虎蝦、孔雀鮑。 帶子好肉，鮮甜多汁；趁食鐵板燒必然要點之一大虎蝦，鮮甜多汁彈口，而且建議蝦頭啲膏都要品嚐，好鬼香濃，師傅對海鮮既生熟處理程度十分👍👍👍孔雀鮑一食就知比普通鮑魚更有鮮甜度同咬口更彈而不會韌！澳洲牛柳： 五成熟煮得啱啱好，粉嫩肉色，牛味濃郁，肉質豐富，一試難忘，除咗要有好嘅煮功，明顯食材都高質🤤🤤對我呢個好牛之人留下深刻印象。問師傅點解牛柳咁油香又鬆軟，師傅話秘訣係幫佢按摩🤣🤣海鮮炒飯最緊要飯粒做到粒粒分明，飯唔會乾身有口感，味道夠而且香，仲有隻大虎蝦，煮得啱啱好🤤🤤紅酒煮雪梨 雪梨唔會太淋，酒香重，甜度夠，好適合我😋😋…查看更多

首先要講嘅係，呢度嘅廚師對出品好有心思，每一道菜都做咗好多Decoration.搞到每道菜老婆都要影好多相😂😂頂級牛肝菌忌廉湯好似花張咁 整得好靚，而且味道好濃郁，配搭西式包上 正呀👍英式傳統布袋牛柳外相十級吸引，布袋牛柳里面先有驚喜，原來釀左蠔做一個配搭，味道好鬼夾，剛好我叫左medium，成件都好juicy，係我最鍾意ge口感😍日本宮崎A5和牛肉眼A5和牛，重要係肉眼位置，完全高質食材之作，無得輸，油香爆口，medium成數做得剛好，必試作品🤌🤌Pineapple juice 貼心ge全走冰👍👍…查看更多

因今日有啲事架車泊咗喺Times Square，順便同老婆試吓呢間之前喺K11 musea見過都想試嘅餐廳.可惜有啲中咗伏。環境：先講餐廳門面，其實係幾靚仔入到去亦都座位好寬敞地方好乾淨，環境亦都幾靚，侍應嘅招呼都幾Nice。食物order左有：炸鴨蛋配甜酸醬🤔味道中規中矩，炸得好乾身，但係蛋黃依然有流心嘅效果，呢下工夫要讚，但係味道或者唔係太啱口味，所以好難判斷，只可以話係中規中矩。煎牛柳粒😔呢個有啲出事，明顯就係薄荷醬落得太多，同時間橄欖油亦都落得太多；令到成碟成品好油膩，牛樓嘅質素就一般，咁呢樣當然明白始終一分錢一分貨，但呢個整法真係有啲重手。海鮮冬陰功炒米粉😋炒米粉就做到不錯，救鑊氣、乾身，海鮮嘅料好多，味道亦都適中，老婆都讚好。整體來講價錢唔貴，但味道就有待改善。…查看更多

今日同另一個老友出嚟聚聚。平時好少肯陪我食川辣味既朋友，今日一於就試試呢間川菜餐廳。酸菜魚🤨中規中矩，order左爐魚，魚肉有啲偏散，而且可能醃製時無加到底味，同濃味既湯底有啲接軌唔到。白灼粉腸😋粉腸清洗算係乾淨，數量好多，呢個價錢黎講高CP值，值得一提，有個附帶用黎點既蒜蓉豉油正👍滷水拼盤😌份量好多，但味道就中規中矩，附帶𠴱碟辣油都幾辣，我哈太食到😂本身譚仔大約食三小辣椒鹽豆腐🤪呢個就真係有少少撻Q，外圍炸到好脆，夠乾身，但係入邊就完全無咩豆腐流出黎𠴱種環境：適合大圍聚會，見人哋打邊爐好似好正咁，值得一提嘅係見到隔籬枱碟手切牛肉好鬼靚，油花比例非常好（平時自己係會入貨自己切牛小排既人士，叫做有少少經驗所以我一睇就知嗰條係靚嘢）但係如果係想人少少聚一聚傾吓計就唔太適合因為環境比較嘈。…查看更多

兩公婆放假出去遊下車河黎左大埔，咁啱見到一間好特別嘅餐廳入去試吓，原來係廚師發板鐵板燒。聽主廚講平時來之前最好先預訂，因為有時會無位，今日算好彩，walk in嚟到有位。我哋兩個人叫咗兩個$79x既set，飲品清清地叫左兩杯梅酒。頭盤係煙三文魚沙律，用左我最鍾意既蘋果醋龍蝦汁伴野生大虎蝦😋海鮮最忌過熟，生熟剛好，蝦肉彈牙有甜味，蝦頭多膏兼且香，估唔到嘅嘢，伴碟嘅龍蝦汁再度加分，聽主廚講，個汁醬煮左好幾個鐘頭後再過濾再煮濃身，難怪可以做到咁香濃甜味重而滑口，真係心機菜。南非孔雀鮑😋爽口彈牙，配埋自製嘅蒜蓉醬，香味十足。宮崎豬😋軟身香口，配埋菠蘿汁酸甜開胃。澳洲M5牛小柳😋食得出本身食材有質數，其次成數剛好，稔，甜。虎蝦蛋炒飯😋主廚亦因應番我地兩公婆較清淡既口味，幫我地落少啲岩鹽，味道啱好，珍珠飯粒口感彈牙。好耐無食過咁有水準既炒飯紅酒浸雪梨😋雪梨酸酸甜甜 配搭返紅酒嘅香味，令我諗番起一道菜（鵝肝配浸過紅酒既蘋果片），作為飯餐最後一道菜一流。…查看更多