萬眾期待嘅美國過江龍The Cheesecake Factory終於於澳門試業，澳門嘅朋友唔使過大海就食到啦！餐廳位於澳門金沙城中心，佔地8500多呎，除咗有4款新菜式外，仲供應澳門獨家嘅葡式燒雞啊。
葡式燒雞(澳門限定)($218)
去澳門又點可以唔食葡國雞，呢味葡式燒雞融合咗澳門及美國特色，醬汁混合咗香甜嘅椰香咖喱同微辣嘅花生醬。燒雞鮮嫩多汁，配菜脆薯仔同熱熔芝士都好有驚喜。菜式係澳門限定，想食就一定要過嚟食啦。
而澳門分店試業期間亦推出四款新菜式，分別係香脆椰菜仔、墨西哥活力早餐夾餅、泰式椰香青檸雞肉及香脆雞肉蝦配菠蘿，遲啲亦會於香港店供應！
香脆椰菜仔($98)
椰菜仔炸得香脆，微微帶苦澀味，加上煙肉粒同楓糖牛油醬汁，鹹甜苦嘅味道會越食越開胃同上癮。
墨西哥活力早餐夾餅($148)
菜式靈感來自經典的西班牙香腸薯仔墨西哥夾餅，以墨西哥軟玉米餅夾住芝士炒雞蛋同雞肉腸，加上芫茜、墨西哥煙燻辣椒同莎莎醬，味道好豐富～配埋黑豆、牛油果醬或酸忌廉食仲無咁膩添。
泰式椰香青檸雞肉($158)、香脆雞肉蝦配菠蘿($158)
今次仲特意推出兩款有東南亞特色嘅飯類，泰式椰香青檸雞肉醬汁以芒果、薑、蒜及乾蔥製成，充滿香料味道，好有異國feel啊～而香脆雞肉蝦配菠蘿嘅甜酸汁微微帶辣，又幾開胃。
除咗新菜式，餐廳當然有得食一系列嘅招牌菜，份份都好有份量，最後當然要揀返個Cake食啦！
Luau夏威夷盛宴沙律($228)
餐廳招牌沙律之一，包括沙律菜、菠蘿、青瓜、紅黃甜椒、四季豆、蘿蔔及洋蔥，加埋烤雞胸肉同香脆餛飩皮，最後灑上夏威夷果仁、花生同芝麻增添口感，撈埋油醋汁，好味又健康！
牛油果脆卷($158)
牛油果脆卷釀咗滿滿嘅牛油果蓉 、加埋番茄乾、紅洋蔥和芫茜，以春卷皮包裹後炸至香脆，牛油果迷必試！
馬德拉酒雞肉($268)
呢味係餐廳另一人氣雞肉菜式，香煎雞胸肉配上鮮蘆筍同微微溶化嘅芝士，淋上鮮蘑菇馬德拉甜酒汁，配菜薯蓉都好香滑啊！
地址: 路氹城金光大道第五至六地段金沙城中心2樓2203D&E號舖
文、相: Yanica