人總係貪新鮮，一般麵包而家已經唔夠吸引？近年多咗創意掛帥嘅新派麵包店，無論係喺菠蘿包當中加入真菠蘿、糅合唔同地方創意推出新口味，定用天然食材做出可愛造型，一樣落足心機、值得支持！
 

鮮製真菠蘿包  菠蘿彪

圖：餐廳IG

老婆餅無老婆，菠蘿包無菠蘿呢句成日都聽到，但如果喺呢間今年 2 月新開嘅菠蘿包專門店就唔係咁講，皆因佢哋有真·菠蘿包：裡面有自家熬製、加咗熱情果嘅鮮菠蘿餡！食落酸酸甜甜咁，比一般菠蘿包更清爽。另外亦有菠蘿麻薯波波，外脆內軟又帶啲煙韌。
 

法式麵包新變奏  Honest Bakery

圖：餐廳IG

呢間麵包店主打法式麵包，有經典嘅牛角包、鬆餅、可麗露、曲奇等。不過最吸引嘅係一系列堂食嘅創意美食！好似叻沙蝦多士，烘至外脆內軟嘅麵包，加上彈牙蝦肉同惹味叻沙汁，層次豐富。北非香辣蕃茄焗蛋配酸種包，同榛子年輪牛角包亦值得一試。
 

天然色素動物吐司  日初四時麵包館

圖：餐廳IG

藏身於美食廣場嘅手工麵包店，標榜選用日本及法國優質麵粉，絕不添加防腐劑、人造色素。好似造型可愛嘅動物吐司，利用南瓜、芝麻等食材嘅天然顏色，加上燙種發酵，口感柔軟好啱畀小朋友食。德國鹼水包外皮較硬，佢哋加入開心果醬、芝士腸等餡料，希望大家可以試試。