米芝蓮呢本美食指南相信大家唔多唔少都參考過，想跟推介食盡亞洲美食但又無時間？得，而家只要大家花一日中秋假期就可以試到二十幾款嚟自新加坡、日本同澳門嘅米芝蓮美食！皆因首個「米芝蓮指南港澳街頭美食節」即將登陸澳門，車胎人美食推介同星級名廚同場獻技，值得各位為食友期待呀。
 

先嚟睇睇新加坡嘅代表，最受觸目嘅係首間得到米芝蓮一星肯定嘅娘惹菜餐廳「Candlenut」，大廚Malcolm Lee擅長以現代烹調手法煮出正宗娘惹菜。而美食節當中將會供應咖喱蟹麵等名菜。而另一間值得留意嘅係新加坡第一批星級小販檔代表之一「香港油雞飯麵」，主廚陳翰銘會嚟到澳門為大家炮製招牌油雞飯。
 

新加坡米芝蓮餐廳代表仲包括創意料理店「Labyrinth」、世代相傳嘅中菜館「瓊榮記海鮮」、以創新手法製作新加坡菜同中菜嘅「超好面」，同新加坡首間星級印度餐廳「Song of India」。
 

而日本米芝蓮代表亦有來頭，首先有東京馳名嘅串燒小販檔「酉玉」(Toritama)，總廚伊澤史郎先生將會親自嚟到澳門大家帶嚟燒雞串同燒大分縣豚肉串兩款特色串燒。另外仲有大阪代表「甲賀流本店」(Kougaryu Honten)，主打嘅就就係大阪街頭小食章魚燒，配以三款特色醬汁，成個Feel真係有啲似真係去咗日本掃街咁！
 

最後當然唔少得澳門嘅米芝蓮美食啦，參與餐廳包括以鮑魚菜式聞名嘅「玥龍軒」，精緻上海菜「上海魅影」同新派中國南北方菜「碧迎居」。

米芝蓮指南港澳街頭美食節
活動日期：2017年10月5日至8日
活動時間：12:00 - 20:00
地址：澳門路氹連貫公路新濠影滙「澳門食街遊」
*免費入場，食物則需要即場購買現金券

文：Cathy