經過漫長嘅「無假」三月，終於等到四月放返幾日復活節假了～都係時候趁呢幾日畀自己放鬆吓，過返個「悠長假期」。一個豐富嘅brunch就啱晒，可以瞓晏少少先動身去吖嘛，食完個brunch先再慢慢plan去邊玩都未遲啦！

歐陸豪華海鮮　The French Window

玻璃屋嘅設計，方便一邊欣賞維港海景一邊嘆個精緻嘅歐陸海鮮brunch，夠晒chill。首先出場嘅係豐富嘅海鮮拼盤，法國生蠔、波士頓龍蝦、青口等等都有，主菜都有多款選擇，黑松露菠菜班尼迪蛋、和牛柳伴鵝肝及松露汁、芝士焗波士頓龍蝦配干邑汁等，無論你係肉食獸定海鮮控都可以滿足到，重點係，復活節期間有限定優惠，凡惠顧四份brunch即可獲送NV G.H. Mumm Cordon Rouge Brut (750ml)香檳一瓶呀。

豐富的西班牙早晨　La Rambla by Catalunya

同樣有維港靚景，地方真心夠晒大，仲有戶外陽臺㗎。而呢度主打西班牙菜式，brunch當然會供應多款西班牙小食，包括伊比利亞火腿、醃肉同埋西班牙薄餅和粟米餅啦，兼有復活節限定美食：烤生蠔、珍寶地中海紅蝦等西班牙海鮮，仲有應節嘅傳統復活節蛋糕，大人細路都啱食！

意式地方美食　Spasso

呢度嘅brunch主打用時令食材炮製意大利特色美食。餐廳專誠搵咗多款少見嘅意大利地方食材，就好似Lazio雅枝竹Ricotta芝士蛋糕、Sardinia蠶豆意式麵包同埋烤小山羊伴甜香桃木葉同黑橄欖。復活節點可以冇復活蛋？呢度就有個超應節嘅區域叫「雞蛋區」，供應以雞蛋炮製的傳統早午餐菜式，仲有多款復活節傳統經典甜品。星期日當日更特設小朋友復活蛋裝飾比賽，分分鐘有機會贏到飲食禮券~

純素綠色復活節　nood food

至於素食嘅朋友，復活節一樣有啱你哋食嘅brunch，兼且可以喺灣仔星街小區天台花園嘅草皮上野餐，就算冇離開鬧市，都可以享受到一刻嘅寧靜。呢個期間限定嘅純素無蛋brunch，以野餐籃形式出場，籃內有墨西哥純素玉米片配4款醬料、素肉漢堡或純素三文治等，主要都係用無添加天然食材同healthy food烹調，百分百純素且不含防腐劑。就算唔係素友，weekend畀自己refresh下一餐半餐都唔錯～不過要喺4月16日前預訂啊～，因為係每日限量供應20份咋！

文：Yanny