協奏坊西餐廳

營業中

休息中

想同朋友享用1頓悠然精緻嘅午餐，發現呢間有semi buffet lunch，地點方便，座位闊落，格調華麗舒適，價錢亦相宜，最啱慢活一個下午。每人包1份主菜，沙律，小食，湯，飲品，甜品可以任食。主菜3款，可以揀香煎金鰤魚泰式酸辣汁，燒豬鞍扒配露絲瑪利汁，香葉肉碎飯。今次試左魚同豬，煎魚好香，味道有點似比目魚，配香茅同香蔥泰式酸辣汁，味道香辣清爽。燒豬鞍好厚肉，肉質鮮嫩，豬味濃郁，配露絲瑪利汁，味道好夾，配搭忌廉薯蓉同烤三色椒，份量十足，連骨都唔可以錯過。任食部份選擇亦唔少，熱盤有炸雞，炸薯條，豉油皇雞搥，豬肉串燒，燒排骨，炒蔬菜，炒麵炒飯等，沙律有牛油生菜，蕃茄，香草蝴蝶粉沙律，凍火腿片。最有驚喜係泰式湯，係香茅椰子雞湯，椰子香茅味道好香濃，微酸幼滑，飲多幾碗都無問題。甜品選擇亦好多，有朱古力噴泉，雪糕，藍莓芝士蛋糕，朱古力慕絲蛋糕，熱情果奶凍杯，椰汁糕，生果，味道唔錯，菠蘿特別甜，芝士蛋糕亦幾好味。咖啡奶茶可以自助任飲。食飽可以慢慢坐到2點半，所費不多就可以悠悠閒閒一個下午。