犇道 Chef Ben- Cafe & Steak Bar (弦海) (已結業)

今日同個屯門朋友食late lunch🍽，佢話佢屋企附近有間好正嘅cafe，咁就梗係要去試吓啦。我哋叫咗和風全日早餐🍡🥗🥐、日本唐揚炸雞蛋包飯🐓🍳🍚🍛、炸薯條配松露醬🍟同兩杯凍朱古力咖啡☕️。1️⃣ 和風全日早餐裡面有日本漢堡扒、日本煎蛋卷、東京湯章魚丸、日本年糕串、麻醬菠菜、薯蓉沙律、炒雜野菌、沙律菜同牛角酥。真係好豐富嘅早餐！特別鍾意漢堡扒，多汁肉嫩。日本年糕串都好食，煙靭可口，我最愛嘅質感。2️⃣ 日本唐揚炸雞蛋包飯哩個我同朋友都覺得非常好食。黑咖哩汁好香好濃郁，惹味開胃，餸飯食好正。炸雞都炸得好香口酥脆，略嫌炸粉有少少厚。3️⃣ 炸薯條配黑松露醬薯條份量好多，多到我哋食唔晒。黑松露醬好香濃，每一條薯條點上一大擗嘅醬，真係人生一大享受！4️⃣ 凍朱古力咖啡相對地有少少失望，無乜咖啡香味，朱古力味亦比較淡，味道啱啱合格。特別要讚賞女職員嘅服務，友善親切，殷勤周到，100分👏🏽。