網上見到呢一間中菜館， $299可以有半隻片皮鴨，而且仲係一鴨兩食，所以今日特登嚟試吓。
14
星期六12點左右上去，得幾台客人，我哋被安排咗坐窗邊卡位，呢度環境都幾開揚，雖然附近好多高樓大廈，但係其實都望到少少維港嘅海。
半隻片皮鴨，配冬瓜鴨架湯($299)
上菜速度好快，呢度嘅片皮鴨，肉係比較多啲嘅，佢哋嘅鴨皮好脆身，好香口，配料都幾足，有青瓜，蜜瓜，蔥，酸梅醬，北京填鴨醬，糖。皮都俾咗好多塊，大概兩個人食，每人都有6塊左右。個湯有啲失望，飲唔出鴨味
，雖然佢的確有好幾件大嘅鴨骨/肉喺入邊，但係係作為一個普通冬瓜湯嚟講，都幾好飲，幾清甜。
南翔小籠包($85)
每次食上海嘢必點，呢度嘅小籠包雖然唔算皮簿，但係佢哋嘅湯汁都幾多，而且肉質好實淨，質素都係合格嘅水準。
上海粗炒麵($118)
最後仲叫咗個主食，中規中矩，味道適中，份量都幾多。
$300唔使可以食到半隻片皮鴨(2食)，其實而家喺香港算幾抵，有興趣嘅朋友都可以嚟試吓。
