小皇府 (MOKO新世紀廣場)

營業中

休息中

侍應們—好細心醒目，見一行七人冇訂位，安排兩張連接隔膠板細枱外，再拍多咗方形枱嚟加長。加茶加水快唔駛提，笑容滿面。XO醬煎腸粉—超香熱辣辣，無端變成開胃小食，鹹淡適中，食指大動。芝麻蛋散—平時嫌佢又厚又甜到嘔，呢度整得佢好鬆化，糖漿亦清甜，想食多幾件。豉油皇龍鬚炒麵—魷魚鬚雖然偏少，但又係好惹味，炒得夠鑊氣。南乳豬手撈麵—豬手炆得夠腍入味，撈湯有韮黃碎同蝦籽，比一般中式撈麵伴湯濃味，麵質爽口彈牙。鮮茄上湯鮮竹卷—番茄同鮮竹卷似乎有啲錯摸，有啲突兀唔多夾，還好茄蓉唔酸，執番身彩。鵪鶉蛋燒賣—愈嚟愈多中式食府唔整喇，味道本身都係啲豬肉加粒烚蛋，純粹懷舊。小蜜蜂🐝流沙包—顏值搶fo ，size的式，記得外貌多於內「餡」。葱花炸兩腸粉—炸兩已經唔脆。如果當睇演唱會，呢味絕對係廁所位。咖哩土魷—土魷始終用咗水發並非鮮魷，預咗冇魷味，但幾欣賞調呢個咖哩汁，香濃唔嗆，甚至用嚟撈吓陳村粉。