梵日本焼鳥

營業中

休息中

突然想食日本嘢，收工喺尖沙咀搵咗間樓上舖。佢呢度嘅位置唔係好多，最主要都係Bar枱，如果真係多人嘅話最好就book咗枱先。佢呢度真係日本嘅廚師，所以同喺日本食飯一樣都有一個前菜，今晚嘅白子同埋魚春，如果唔係日本料理愛好者，我諗都唔係會成日食得到。佢呢度主打串燒，而所有串燒都係即叫即燒，廚師喺你面前燒，其實日本嘅串燒好食係因為佢哋嘅用心，因為真係每一都好細心照顧，寧願出餐出得慢，都唔會有任何嘅唔完美。就好似呢串牛舌咁，真係超級腍同埋多汁，只係簡單用鹽來做調味已經好正。另外有一個好特別嘅係呢個野菜和牛，賣相都已經色彩繽紛開胃，而佢個牛雖然係全熟，但係都好腍好重牛味。另外見到佢呢度有香煎鵝肝，平時如果食鵝肝一定係配多士。但係呢度真係就咁煎香左塊鵝肝俾你，出邊係煎到脆卜卜，但係一咬開嘅時候係入口即溶，真係好奢侈。另外新鮮海膽就食得多，今次見到個餐牌有一個係鹽漬海膽，於是嗌嚟試吓。原來佢係將啲新鮮嘅海膽攞去醃，所以要配上紫菜加青瓜去沖淡佢嘅鹹味。另外仲有一樣，我覺得好出色嘅係佢呢個炭燒走地雞髀肉，喺廚師燒緊嘅時候已經好似睇表演咁。上到枱都覺得超級香，再加埋佢哋特調嘅柚子辣醬，真係清新得嚟又惹味。