幸屋

營業中

休息中

港島區食店林立，而且犀利在就算係橫街小巷嘅餐廳，都有臥虎藏龍嘅高手存在。上個星期，我有個前輩帶我去食飯，佢帶咗我去一間位於灣仔小巷入面嘅拉麵店。呢間舖頭的確係好低調，低調度你好有可能行過咗都唔知。前輩嗌好咗嘢食之後，我哋傾咗一陣計，好快食物就上枱喇。首先上菜嘅係「蟹籽沙律」。呢個沙律一啲都唔馬虎，你睇吓，係滿滿嘅沙律醬同蟹籽呀！之後上枱嘅係「和風炸雞」，外脆內嫩，仲有啲肉汁漏出嚟添，而且炸漿唔會太厚，睇嚟師傅嘅功力都有返咁上下。跟住上菜就係我嘅「廣島蠔沾麵」，沾麵係日本拉麵嘅一種，特點係湯汁同麵條會分開，將麵條蘸湯汁食用。一般嚟講，沾麵嘅湯底比較濃稠，似汁多過似湯。呢度嘅沾麵都係一樣，將比較結實而富有彈性嘅麵條放入去濃味嘅湯汁入面，一拉上嚟所有湯汁都掛曬喺麵條上面。麵條避免咗浸得太耐而變軟，同時濃厚嘅湯汁又帶嚟強烈嘅味覺衝擊，簡直係完美。千祈唔好漏咗啲廣島蠔，隻隻都好肥美，隻隻都蠔味濃郁。而前輩食嘅就係「蒲燒鰻魚丼」你睇下啲鰻魚幾咁厚身，前輩話呢度啲鰻魚味道偏重，但係同時又夠肥美，非常難得。最後一定要多謝前輩帶我嚟呢度食呀！