影片
更多
2023-02-13
1847 瀏覽
都市人要減除壓力，有好多方法，有啲人就大飲大食、去旅行、去行山、打波做運動，亦有啲人飲杯咖啡、嘆杯茶，都喺好舒緩壓力嘅方法。今日嚟到海運大廈嘅「Tea Moment」茶飲店享受一下悠閒時光，飲返好個靚心情。 依家時下開咗好多茶飲店，不過大部分都喺比較台式，亦都只喺主打外帶，可以堂食嘅比較少，但呢度就好唔同，先講講環境，有種好文青風嘅感覺，又似間咖啡小店，裝修非常雅緻。 其實初時唔知道佢賣咩茶，以為都喺台式，但近門口嘅展示櫃，細看之下，原來喺中式茶嘅變奏。店員介紹佢哋喺同本地茶葉老字號「福茗堂茶莊」攜手合作，更研發咗全球第一部人工智能泡茶機，將傳統泡茶技藝跟現代科技融合，令各種茶葉有更大發揮，怪唔之得裡面有幾座大大嚿嘅儀器啦！店家嘅宗旨，正如店名嘅中文譯名「活在茶下」，希望客人透過一杯茶，飲返好心情，當然，放慢步伐，坐低慢慢細嚐。 晌展示櫃上，擺放咗店家所賣嘅6種茶葉，包括綠茶、白茶、烏龍茶、紅茶、黑茶 及花茶，每一種茶葉都有詳細介紹其特性、色香味同埋讓人飲出咩心情，非常有意思，而且，每種茶佢都有一支霧化器，可以撳嚟聞一聞吓啲茶香，非常得意。 每一種茶葉旁邊，都有一種該茶葉所代表嘅顏色，
依家時下開咗好多茶飲店，不過大部分都喺比較台式，亦都只喺主打外帶，可以堂食嘅比較少，但呢度就好唔同，先講講環境，有種好文青風嘅感覺，又似間咖啡小店，裝修非常雅緻。
其實初時唔知道佢賣咩茶，以為都喺台式，但近門口嘅展示櫃，細看之下，原來喺中式茶嘅變奏。店員介紹佢哋喺同本地茶葉老字號「福茗堂茶莊」攜手合作，更研發咗全球第一部人工智能泡茶機，將傳統泡茶技藝跟現代科技融合，令各種茶葉有更大發揮，怪唔之得裡面有幾座大大嚿嘅儀器啦！
店家嘅宗旨，正如店名嘅中文譯名「活在茶下」，希望客人透過一杯茶，飲返好心情，當然，放慢步伐，坐低慢慢細嚐。
晌展示櫃上，擺放咗店家所賣嘅6種茶葉，包括綠茶、白茶、烏龍茶、紅茶、黑茶 及花茶，每一種茶葉都有詳細介紹其特性、色香味同埋讓人飲出咩心情，非常有意思，而且，每種茶佢都有一支霧化器，可以撳嚟聞一聞吓啲茶香，非常得意。
每一種茶葉旁邊，都有一種該茶葉所代表嘅顏色，用嚟做咩呢？原來喺俾啲客人表達佢哋想有啲咩心情，就放喺櫃檯上嘅收集板，睇見咁多黃色嘅葉，原來好多人都喺希望悠閒抖一抖。
此外，下邊仲有好多跟茶飲相關嘅物品作零售，例如有「福茗堂」嘅普洱茶餅、一套特色嘅茶杯、茶壺、保溫杯、茶包禮盒……等等。
雖然 6種茶葉作基調，查實茶飲款式有好多，以分類計，有啲茗茶、調飲、燕麥奶調茶、經典茗茶、手泡檸茶；以配合各種茶飲，亦有多款美食，例如特色雞蛋仔、健康料理、軟雪糕、鬆餅、茶曲奇……等等，好多更以茶作為元素，真喺唔止飲茶咁簡單。
仲有就喺店家特意將各種茶葉嘅一凍一熱飲品，配上食物作為一個推介建議，當然，客人唔一定咁配，不過試下又無妨。
普洱燕麥奶 $45平時響茶記飲奶茶就飲得多，普洱茶配燕麥奶肯定喺人生第一次，估唔到又夾得到喎，雖然唔似飲奶茶嘅感覺，但喺，普洱燕麥奶確喺幾香，加咗一小片八角，更滲出微微八角香，真有意思。個人覺得，奶泡打得厚身多一點，口感可能更好。
香茅茉莉 $48呢款香茅茉莉，以香茅、蕃茜、青檸、茉莉花茶混合，只有凍飲。因為加咗香茅、蕃茜、青檸，所以入口非常清爽，但又唔會覺得好古怪，幾種味道加埋一齊，又意外地襯，真喺茶飲嘅創意可以無限大。
鐵觀音鬆餅 $35、大紅袍茶曲奇 $38烘焙套餐喺購買任何茶飲，加$25就可配原味雞蛋仔、鬆餅或茶曲奇，而鬆餅另加$15可配上奶油及果醬。鬆餅嘅茶味好突出，口感實在，但唔會太乾，伴上嘅奶油好香滑，果醬亦都好特別，應該喺桃味果醬，但更加入一啲果皮肉；茶曲奇好大件，入口鬆化，同樣茶味香濃，配茶飲真喺幾得意。
宣威火腿芝士雞蛋仔 $68呢款雞蛋仔每日限量，既然有供應，就唔好錯過試一試，餐牌標明喺用上雲南宣威火腿、頂級蘭王蛋，自然有所期待。當然賣六十幾蚊一份雞蛋仔唔可以講平，不過晌度喺一種環境嘅享受，況且，雞蛋仔烘得脆口，蛋心綿密，唔會得陣風，而且好有蛋香，配以火腿、芝士，鹹鹹香香，實在唔錯。
題外話，應該新張關係，有個「買一送一」優惠，但就要做番少少步驟，不外乎晌店家嘅IG / FB讚好、追蹤，又公開分享啲飲食物照咁啦，而呢個着數去到2月24日，好短咋，真要把握機會！
今次嘅茶飲嘅體驗喺幾特別，悠悠閒閒咁，飲返出一份輕鬆心情！
張貼
