Mother of Pizzas

營業中

休息中

禮拜五晚要等位，等咗20分鐘左右；排隊位置有個好嘈好大聲嘅喇叭😂嗌咗椰香夏威夷人同帕爾馬火腿雙拼。夏威夷人口味比較細路，係番茄，肉腸加甜菠蘿，菠蘿好甜，好似細個食嘅嗰啲鹽水菠蘿咁。帕爾馬味道唔錯，火腿有風乾醇厚味，火箭菜有激烈啲嘅辛香清新味，番茄底好濃厚，三者加埋意外地融洽。至於餅底本身，我覺得有啲疑惑，感覺麵粉冇乜麥香味，食得出應該的確係長時間發酵（有少少類似酒精、啤酒嘅風味，甚至覺得有啲發酵得太過），不過好塌，邊位冇曬氣泡，雖然的確好湿潤，但覺得更加似係”死麵”的質感，唔知係我理解有錯定係呢次咁啱嘅麵團狀態唔好。餅皮中間似乎因為本身好薄，加上有好多醬料，太過湿潤了，加上佢唔係出爐第一時間就上菜，總覺得有啲可惜冇食到熱騰騰外香內湿的餅底。甜品嗌咗二人份提拉米蘇。好食，甜而不膩，咖啡粉够苦（雖然覺得可以再苦啲），芝士醇厚而清新，咖啡酒雖然甜但甜味唔會似食糖漿咁”癡住喉嚨”。總體而言體驗中等偏上，呢個價錢唔算便宜，但勝在用料紮實。似乎比較多人鐘意愛的夏天同啖啖肉，可能比起今次我嗌嘅嗰兩款口味更大眾化，下次會再嚟試。