隨便坐車仔麵燒烤

營業中

休息中

喺未駛出街戴口罩嘅時代已經嚟過幫襯，當時係有車仔麵嗌，喺門口左面櫃檯叫姐姐執藥咁左執右執啲餸、麵底，俾低幾十，就自己捧住入面坐，順便再寫紙仔落單遞串燒，呢part就離開先埋單。依家個姐姐話疫情關係已cut咗車仔麵檔，門口多咗檔鹵味大叔即叫即斬。冷氣舖面裝潢大致一樣，只係冇咗張二人枱，依然係4張四至五人枱、圓凳。舖外幾張枱繼續室溫冇冷氣，有骰盅供應。冇澱粉質供應就唯有幫襯門口大叔加餸，再拎入舖食。執咗盒鹵水鵝腸、雞臀、鵝掌翼，盛惠$135。質素尚算企理，但較味頗鹹，腎弱慎食。嗌咗大量串串。串燒主要都係用七味粉灑面，所以調味只一個味，揀咗點沙嗲汁。唔知係難洗碗定唔夠碗碟，每位係用紙碟、木筷子，而串燒上住一批，食食吓佢再上一批，就將新嗰批串燒倒落之前嗰碟度。終於出事，其中一次將鄰枱點啲串燒倒咗落我枱隻串燒碟度，同侍應對單後佢將倒錯落嚟嗰啲串燒執番走，至於會否原食就咁俾番鄰枱定倒落垃圾桶就不得而知⋯⋯比較食得過係燒雞全翼、燒羊肉、燒原條茄子（嚟到必食）、燒秋葵、炒韮菜（見隔離兩枱都有嗌且炒得幾令）、豬大腸。食吓食吓唔覺淨係串燒、飲品埋單都三百幾，唔可以叫抵食。