陳儀興尚潮樓 (太子道西)

營業中

休息中

聽聞新蒲崗老字號陳儀興於太子開咗全新概念店，裝修優雅脫俗、食物精心設計、手工細緻、不失潮州菜風味。今日去開太子果頭，當然去埋陳儀興尚潮樓啦。店舖果然如介紹一樣、環境舒適，而且服務非常周到。打開餐牌，雖然好多菜式想食，例如廿年老菜脯鮮豬肚湯、魚露浸花蛤、螄蚶、魚露浸花甲咁，但都係俾常食開嘅鵝肝、鵝腸、鵝肉、豬手等等吸引咗。鵝三寶：分別有鵝肉、鵝腸以及鵝肝，鵝三寶底下有豆腐。陳儀興嘅潮汕滷水好好食就已經係街知巷聞嘅事，我特別鍾意佢哋嘅鵝肝。鵝肝厚切，而且入口即融，非常之正。金不換燉海螺：燉湯好清，金不換新鮮清香撲鼻，而且本身同海螺好夾。清燉荷包鱔：清燉荷包鱔是潮州菜的王牌手工菜之一，鹹菜葉包裹住白鱔，然後加入上湯清燉。鱔肉肉質肥厚、鹹菜的鹹、白鱔的鮮、配合得天衣無縫，一流之作！梅汁炆豬手：充滿骨膠原的菜式。豬手軟淋，汁料酸甜好好味。而另一個顯示手工同細心嘅地方，就係豬手都起哂骨，入口每一啖都係豬手皮同豬手肉。豬手再配上一碗白粥，中和豬手骨膠原嘅黏口感。飲品方面，我哋點咗汕飲品烏豆水同老藥桔。烏豆水就甜味：而老藥桔就咸味、似咸甘吉咁，既好飲又健康。