影片
更多
2018-10-21
61 瀏覽
最近的天氣終於開始轉涼，迎面而來嘅涼風就好似一把小小嘅聲音不停跟我講：打邊爐嘅季節來了。今日就約咗兩個邊爐腳去九龍城覓食。九龍城依個地方除咗泰國菜出名之外，其實都有幾間火鍋店相當馳名。今日揀依間牛精皇係因為之前黎九龍城食泰國野個時經過，見到店名為牛精皇咁巴閉，隨即就上網睇一睇食評，見到好評如潮，所以一早mark底咗依間店，終於有機會試吓佢質素啦首先餐廳唔算好大，但係座位都算舒服。坐低職員就放低一部Ipad俾我哋揀野食，職員亦都有介紹吓套餐，而且體貼地提議我哋揀二人餐，因為比較化算。最後我哋就揀咗個精選2人餐$548，再自行揀咗其他配料：萵筍配蜂巢豆腐$48、炸魚皮$38、即炸響鈴$58同脆炸午餐肉$48。另外見到仲有其他小食可以揀，就揀咗個椒鹽雞中翼$48。飲品就叫咗烏梅汁一齊share飲。本身二人餐嘅湯底係清湯，加返差額就可以轉湯底，我哋就揀咗泰式冬陰公湯底。落單後職員會放低調味盤，都係基本生蒜蓉、炸蒜蓉、辣椒、芫茜、豉油同蔥花，比較特別嘅係佢有黑醋同麻油。湯鍋一上枱已經俾佢嘅香味引到流晒口水，係等個湯滾起後我哋無即刻放食物，先飲個湯底，果然有驚喜，味道比我之前食火鍋嘅冬陰公湯底都濃
今日就約咗兩個邊爐腳去九龍城覓食。九龍城依個地方除咗泰國菜出名之外，其實都有幾間火鍋店相當馳名。今日揀依間牛精皇係因為之前黎九龍城食泰國野個時經過，見到店名為牛精皇咁巴閉，隨即就上網睇一睇食評，見到好評如潮，所以一早mark底咗依間店，終於有機會試吓佢質素啦
首先餐廳唔算好大，但係座位都算舒服。坐低職員就放低一部Ipad俾我哋揀野食，職員亦都有介紹吓套餐，而且體貼地提議我哋揀二人餐，因為比較化算。最後我哋就揀咗個精選2人餐$548，再自行揀咗其他配料：萵筍配蜂巢豆腐$48、炸魚皮$38、即炸響鈴$58同脆炸午餐肉$48。另外見到仲有其他小食可以揀，就揀咗個椒鹽雞中翼$48。飲品就叫咗烏梅汁一齊share飲。
本身二人餐嘅湯底係清湯，加返差額就可以轉湯底，我哋就揀咗泰式冬陰公湯底。
落單後職員會放低調味盤，都係基本生蒜蓉、炸蒜蓉、辣椒、芫茜、豉油同蔥花，比較特別嘅係佢有黑醋同麻油。
湯鍋一上枱已經俾佢嘅香味引到流晒口水，係等個湯滾起後我哋無即刻放食物，先飲個湯底，果然有驚喜，味道比我之前食火鍋嘅冬陰公湯底都濃郁得多，確實做到泰國餐廳中冬陰公湯嘅味道，而且湯底中已經有青口、蝦、蕃茄及菇，蝦好爽口，而且青口好大隻。
之後配料就出場了，二人餐嘅配料包括有：頂級手切牛肉、極品安格斯牛肉粒、牛白肉、手打蝦丸、手打墨魚丸、手打鯪魚球、牛丸、青口、蟶子、鮮蝦雲吞、自家水餃、韮菜餃、魚皮餃、雜菜藍以及手打烏冬或者出前一丁，而我哋就揀咗手打烏冬。配料用三層架擺放，慳位得黎又精緻。
職員非常用心咁介紹配料，而且提醒我哋牛肉煮幾耐先係最好味。首先牛白肉我就未食過，職員話煮8秒內就可以食，而且唔需要點醬汁食。本身以為佢好似脂肪咁，口感應該會係軟身？但口感竟然非常煙韌，而且肉汁好似牛油咁慢慢浸出黎，果然唔需要點醬汁已經有非常濃嘅牛肉香味。如果唔係單點價錢偏貴，真想叫多一碟食。
而頂級手切牛肉色澤紅潤，一睇就知新鮮，脂肪紋理亦分佈平均，只需要煮十秒左右就可以食，真係牛肉味濃且入口即溶，實在太滿足了。
另外美國安格斯牛柳粒就煮嘅時間可以長啲，我哋煮咗8分鐘就食啦，肉味真係好濃，而且充滿肉汁，同樣唔需要醬汁已經好好味。
而手打丸方面，各款丸都非常彈牙爽口，而我最滿意就係手打蝦丸，事關蝦滑中保留咗一啲蝦粒，令到口感更加豐富，而且蝦味好濃。
海鮮方面，青口同蟶子都算大隻，蟶子更是非常爽口。雖然種類不多，但又有牛肉又有海鮮，質素又唔差，真係已經非常滿足了。
而自選配料方面，萵筍配蜂巢豆腐都不錯，萵筍清甜，蜂巢豆腐更是將冬陰公湯索晒，非常惹味，而且雙拼嘅份量剛剛好，可以留肚食其他配料。
而炸魚皮同椒鹽雞翼都不錯，我最欣賞嘅就係炸午餐肉同即炸響鈴，依兩樣都係我打邊爐必叫嘅，依間店嘅午餐肉炸得比平時食嘅香脆，所以落咗湯煮都一樣保持到外脆內軟嘅口感。而即炸響鈴就真係即叫即炸，一放上枱已經好香，同埋熱辣辣，職員隨著放上甜酸醬，可以點醬食或者落湯。兩種食法都好好味。
蔬菜籃有三種菜，而且份量又多又新鮮。
而烏冬作為成個晚餐嘅總結都非常完美，烏冬又彈牙又索味。如果唔係太飽真係想叫多份
食完職員就送上糯米糍做餐後甜品，非常貼心。埋單$1023，以依個份量同質素黎講絕對唔算貴。值得再黎試其他湯底啊！
張貼
