新潮發海鮮菜館

營業中

休息中

復活節假期，老公話不如去過長洲之旅。行到肚餓，咁老公話不如食海鮮。行過呢間餐廳，見到menu都幾吸引，好多海鮮，咁啱又有位，最後我哋入左去。我哋叫左3款海鮮，分別係魚蝦蟹，但都係$278，真係覺得好抵。粟米羹及清炒生菜：呢兩個係送架，送完即止。粟米羹份量多，足足有五小碗，味道ok。清炒生菜雖然係送，但一d都唔馬虎，剛剛炒起，夠綠夠爽口。蒜蓉開邊蒸蝦：蝦新鮮，好香蒜蓉味，鋪埋粉絲蒸更有咬口。避風塘炒蟹：有三隻花蟹，份量唔少。洒左椒鹽同辣椒一齊炒，好有避風塘風味，少少辣，鹹鹹地，夠香，好惹味。豉汁蒸倉魚：魚唔算細條，兩個人食剛好。入口好香豉汁味，魚同樣新鮮，點少少熟油豉油已經好鮮味。