泰屋

營業中

休息中

好一陣子無食到泰國菜，一諗起冬蔭功味道己經口水流，所以一有人問去唔去食就 lur飯應。餐牌未睇就已經肯定叫冬蔭功湯同木瓜沙律；見泰式燒羊架仲平過燒雞就諗都唔使諗即刻加多個order，其他餸菜交由朋友發板，青咖哩雞、馬拉盞炒通菜及幾個飲品。冬陰公鮮蝦湯，分湯時聞到陣香味己經不停吞口水，雖然椰奶份量較多，亦與我偏愛較酸的口味有一點距離，不過因湯内嘅蝦都幾鮮味又大隻，所以唔會扣分。飲完湯就食 木瓜沙律，又係口水流菜式，不過有朋友表示偏辣，但我又反而覺剛剛好，木瓜甜、甘筍爽、醬汁酸辣甜都好平均。馬拉盞炒通菜夠野味又唔算太咸。青咖哩雞點蒜蓉法包，雞肉唔夠入味又韌咗啲似解完涷即落咖哩煮返熱咁。泰式炭燒羊架有三大舊抵食，泰式鐵板上真係較小見，黑椒醬汁香，羊又唔太騷，啱曬想食羊又怕騷嘅朋友。自己飲嗰杯 熱香茅茶可以推介下，因為之前香港嘅泰菜館唔多見；又響泰國飲過幾好味。味道好近似泰國飲到嘅味道，清香唔濃濁，如果可以落少啲啲糖就更好。