花園餐廳 (英皇道)

營業中

休息中

全盛時期嘅扒房開到到處皆是，行行下街，總有一間喺你左近。隨住餐廳選擇越來越多，扒房嘅生存能力都每況越下，剩低嘅，就算質素唔係有返咁上下，都應該係地理位置優越。北角呢間我就見住佢做咗二十年，暴露年齡嘅一刻又到了～假日喺北角探完朋友，經過間個三叉路口，就想起喺二樓果間歷史悠久嘅老店，數十年過去，是否依然如舊？扒，仍然係主打嗎？感覺上，已經同茶餐廳不相伯仲？下午茶時間，卡位都叫做坐咗七成，客量可觀。下午茶餐有好多選擇，食過早餐捱到就快三點，點都要食返啲澱粉質，所以好少有地叫咗個鴛鴦焗飯，揀咗豬扒同蜆肉。莆上檯已經好吸引，蜆肉係白汁，豬扒係洋蔥茄醬，飯底用咗炒飯，至於有冇真係焗到，我有少少保留，一來上得好快，二來冇熱辣辣。成碟飯，最好食嘅係蜆肉，可惜有沙；啲豬扒就真係唔掂，乾蒸蒸，嚡到不得了；個餐免費跟咖啡奶茶熱飲，我個人比較鍾意飲柚子蜜，就要另外加11蚊。杯嘢飲落足料嘅，酸酸甜甜。本來就冇抱好大期望，所以都唔算係失望。只能嘆，喺而家呢個社會，你不求進步，冇人會等你。