主角梗係大閘蟹啦！呢度嘅蟹肉質鮮又嫩，都算多蟹膏。可以任食，上枱快，正！
刺身拼盤好震撼，厚切大件。最鍾意三文魚腩、珍寶赤蝦、馬刀貝、劍魚腩，款款都夠晒新鮮。尤其係三文魚腩同劍魚腩，油脂豐富，入口即化。
極品海鮮拼盤同樣吸引，擺盤美美的。松葉蟹腳啖啖肉又鮮甜，每人有一盒魚子，鹹香十足。升級凍海鮮都係任食，要encore～
海膽帶子大件，帶子鮮甜配上海膽味道濃郁，夾埋一齊層次即刻豐富晒。
湯品有冬陰功蝦湯同香茜三文魚湯，湯底夠香濃，熱辣辣，飲完好暖胃。
大蝦天婦羅同榴槤波波等炸物都係即炸，炸到金黃色。泰式燒元貝同生蠔味道好特色，燒得香噴噴，濃郁蒜香味！燒菠蘿燒過之後仍然香甜多汁，解膩消滯，必點！
泰式燒羊腩外層脆皮，肥瘦適中，肉質軟腍，非常香口！
推介飛天炒通菜同泰式炒椰菜苗，兩個菜都炒得夠鑊氣，爽脆得嚟又好入味，好掂。
松葉蟹杯有蟹肉、蟹膏同蟹籽，一啖放入口，三重蟹滋味。
加錢仲可以升級生啤飲任添。
最後食埋小甜品同雪糕雪條，好滿足！
