養和醫院餐廳

營業中

休息中

朝早喺跑馬地「養和醫院」探病，午餐就好順便咁落咗去四樓個飯堂度醫肚。由於食客全為醫院員工、病人及其親屬，哥哥就提醒咗細佬唔好周圍影，以免滋擾到任何人。真係冇諗到「養和醫院餐廳」雖屬快餐形式經營，在場卻有勁多嘅服務生，環境格局仲有種無形嘅氣勢。入門口有人帶位，並告知餐飲均要喺收銀部落單同全數預繳，不過會有專人傳菜。午市廚師推介款式共有兩頁二十三項可選。秘製海南雞飯（$208）：午市套餐除咗海南雞主菜之外，仲包有油飯、例湯、及三款調味醬汁，賣相簡潔精美。海南雞皮層光滑，肉質軟潤有彈性，毫不嚡口，分別黏上薑汁、甜豉油、辣醬嘅效果各有各好味；配角油飯芳香飽滿，例湯都好清甜。跑馬地名牌「養和醫院餐廳」高雅簡約企理，外表嚴肅嘅服務生專業有效率，餐飲絕對睇得又打得，真心好食嘅，唯一豪華版飯堂級價格未必人人會肯俾。