永記車仔麵

營業中

休息中

永記喺荔枝角都多人幫襯，今日同朋友等咗大約15分鐘先有位。不過店員們好爽手又好有禮貌，真係等一等都值得。落單用填紙仔嘅模式，以小店嚟講選擇都唔少。我今日試咗個三餸烏冬加沙嗲醬，配咗五花腩、魚肉春卷同蘿蔔。五花腩有驚喜，佢比我想像中冇咁肥，又有油香味。魚肉春卷就整得好脆口，同埋切開咗做細件，想同朋友交換下餸 (就係相入面嘅魚皮餃哈哈) 都好方便。蘿蔔三舊大件不特止，仲真係一粒渣都冇，配埋沙嗲醬食冇得頂。車仔麵可以免費加配熱飲，如果鍾意飲可樂嘅加3蚊仲可以轉大支裝添，可樂迷千祈唔好錯過喇！