和氣食堂 (河畔花園)

營業中

休息中

放假入沙田圍探外婆,午餐同佢行過去河畔花園呢間和氣食堂食午餐。正值食晏時間,要等位,幸好等咗十多分鐘就入得去。餐廳細細地,裝修簡單,勝在乾淨企理。QR code 落單,既環保又清楚,慢慢諗完先確認, 方便check 單。會員仲可以儲分潻。餐牌有實在感,有佢嘅存在價值。午餐有壽司定食、雜錦刺身定食、壽喜牛肉鍋定食、魚生丼、拉麵/烏冬餐等多款選擇。午餐有優惠,除免費奉送咖啡或冷熱飲品外,轉特飲都係加$9。加$18可追加兩款小食或$20追加兩款小食及味噌湯。✨巨峰提子梳打&熱柚子檸檬用優惠價,我點咗杯清甜提子香配透心涼梳打。外婆就點咗杯清新潤喉嘅熱柚子檸檬。✨枝豆(第一款小食)用埋第二個優惠,用水煮再加鹽調味嘅枝豆,簡簡單單,保留毛豆原有清香味道同粉腍口感。✨天婦羅(第二款小食)炸粉薄薄嘅天婦羅,新鮮炸起,脆脆口感,除咗茄子同冬菇,外婆食吾出橙色嘅係南瓜定地瓜,總之佢話好甜啦😂✨吉列豬扒蕃茄湯讚岐烏冬大大塊吉列豬扒,外金黃酥脆,內肉質腍軟無骨。讚岐烏冬煙韌滑劣劣,配埋個酸酸甜甜嘅蕃茄濃湯底同爽口昆布,外婆食得好開心!✨芝士牛油果炸蝦卷定食(附:木魚湯烏冬)烏冬有咬口,配上木魚湯,清新吾膩口。