楚撚記大排檔 (日富里百好大廈)

營業中

休息中

今日去咗位於香港大學站隔離嘅楚撚記，平時叫外賣就試得多，但係餐廳長期客滿，今日早咗收工即刻去試下堂食。有啲分店會有自己嘅特色菜，好似西環呢一間就有蠔餅、霸王雞、黑栢葉炒雞腎花，我哋就叫咗地道港式煎蠔餅。蠔餅上面有塊牌仔寫住「請上檯即食」，大家真係要跟足指示，蠔餅好大塊好脆鬆，作為開胃小食或者送飯都一流，而且蠔仔好大粒，就咁食又或者點魚露同埋豆瓣醬都好好食，不愧係分店限定。我哋仲叫咗啫啫唐生菜煲，唐生菜夠翠綠，有蝦醬味，仲落咗蝦乾同辣椒炒。見餐廳poster好吸引，我哋仲叫咗芝士琵琶豆腐，本身都擔心會太膩，結果芝士嘅味道同豆腐出奇地夾，芝士味融合豆腐令佢食落去更加香滑，而豆腐入面仲有少少鯪魚。配菜嘅西蘭花點芝士都好適合。為咗降低罪惡感，我哋叫咗五花茶，清甜得嚟又清熱，而且好大壺好抵飲。食到飽飽，原來餐廳仲有送清補涼做甜品，用料十足之餘清清甜甜，令人感覺好滿足。