HOHON Eatery

營業中

休息中

西環「好漢」小店，舖頭細細，得十個位，開放式廚房更加細，可以睇到廚師煮唔停手，每一碟都用心製作。廚房亦好乾淨，食得好安心。真心呢啲小店好值得我哋支持。*芝士青蔥粗管通粉 $106粗管通心粉煮到質感啱啱好，彈牙唔會腍，而且空心可以裝住好多汁。芝士汁用三種芝士：水牛芝士、車打芝士、巴馬臣芝士，奶香極重，鹹香偏少，水牛芝士應該佔大部分，表面燒至焦香，令每啖食落唔只係芝士汁，仲有層煙燻味，加埋生蔥粒嘅辛辣，完全唔會膩。脆香雞堡 $106獨一無二竹炭薯仔包兩邊都烘熱咗，質感鬆軟之餘，帶淡淡薯仔味，唔會喧賓奪主。雞扒用酸奶酪醃製再做成炸衣，軟化雞扒肉質又保持到juicy嘅肉汁。揀咗煙燻口味嘅自家製蛋黃醬，煙燻味濃烈，同炸雞扒好夾，而且醬汁份量啱啱好，唔會過多令到漢堡好膩，配埋洋蔥、酸青瓜、苦苣，以酸味同苦味平衡翻漢堡一定有嘅厚實感。整體來講味道有層次感，食得出每種食材嘅新鮮同味道。薯條係粗身波浪薯條，個人對呢種薯條有種莫名嘅抗拒，但佢完全改變左我嘅想法。外脆內軟，食到最後都唔會腍，薯條帶香濃嘅薯仔味，調味亦足夠，值得一食再食。