鼎記糖水專門店

營業中

休息中

今日去咗清8探朋友，食完晚飯當然要食返個甜品，朋友就帶咗我哋嚟間鼎記糖水專門店，佢話性價比好高。店舖內都有少量座位，我哋就選擇咗堂食，一路都見到好多街坊嚟買外賣，足見佢嘅受歡迎程度。我哋四條友每人叫一款開心share 。最老嗰位揀咗南北杏紅棗雪耳燉木瓜，原盅燉3小時嘅中式糖水夠哂滋陰，而且真材實料。木瓜清甜、雪耳夠腍夠滑，味道亦唔會太甜，真係高質素。後生仔女就會鍾意食吓芒果甜品，椰香芒果桃膠小丸子西米露配搭新穎，冇諗過芒果同桃膠都咁匹配，再配合煙煙韌韌嘅小丸子，健康得嚟又好味。另外就揀咗芒果芋圓，呢度嘅芒果都好甜，混合埋史上最百搭嘅芒果汁，配乜都咁好食。四色芋圓分別係芋頭、紫薯、南瓜同綠茶味，大粒得嚟又夠Q彈，仲有煙韌嘅小丸子，真係冇得輸。第四款甜品我哋就揀咗椰香紫米芋頭西米露，上枱一刻就好似一個雲石面咁壯麗。入面亦都真材實料，紫米芋頭分量十足，混合椰奶香，絕對係高質嘅味道。呢間糖水舖真係街坊價錢，專業質素，款式又夠多，最近仲見到佢喺外賣平台出現，所以我一定會再幫襯。