第一輪蒸嘅係「蒜蓉開邊龍蝦」同「鮮活鮑魚」。龍蝦一上枱已經氣勢十足，鋪滿金銀蒜蓉。計時器一響，打開鍋蓋那陣蒜香同蒸氣一齊湧出嚟，真係未食先流口水！龍蝦肉蒸得啱啱好，結實彈牙，蒜蓉完全帶出咗龍蝦嘅鮮甜，而唔係蓋過佢。至於啲鮑魚，蒸完之後店員會幫手起埋殼，咬落去煙韌得嚟帶點軟糯，鮮味爆燈！
之後輪到「奄仔蟹」同「巨型扇貝」。隻蟹蒸完之後，揭開蟹蓋係金黃色嘅蟹膏，豐腴到不得了，食落去甘香濃郁。扇貝上面放咗啲粉絲同蒜蓉，蒸完之後扇貝嘅精華滴落去粉絲度，真係精華所在。最後個鍋底仲有集晒所有海鮮精華嘅粥底，飲一啖，成個海洋嘅鮮甜都喺晒個口裡面，為今餐畫上完美句號。
