沙嗲串燒（豬肉、雞肉）4串
串燒即叫即燒，上枱熱辣辣，表面微焦，炭火香幾出。肉質醃得入味，豬肉軟嫩唔鞋，雞肉亦保持到肉汁。沙嗲醬係靈魂所在，花生味香濃帶少少甜辣，蘸多啲更好味！
泰式蝦餅
蝦餅炸得金黃酥脆，咬落去彈牙有嚼勁，真材實料。點埋酸甜醬，好開胃，作為小食一流。
青咖哩牛腩 ＋ 薄餅
青咖哩汁香濃微辣，椰奶味平衡得剛剛好，唔會太膩，裏面仲有啲茄子。牛腩煮得夠淋，入味之餘仲有淡淡香茅同檸檬葉香氣。另外叫咗個薄餅點咖哩，薄餅烘得香脆，蘸滿咖哩汁食，真係滋味十足！
蝦醬炒飯
呢個絕對係必食之選！炒飯夠晒鑊氣，蝦醬鹹香突出，但唔會過份濃烈。飯粒分明，仲加入咗櫻花蝦、四季豆同洋蔥，口感豐富。伴碟有肉鬆、臘腸、青瓜、青木瓜同煎蛋，撈埋一齊食，鹹香鮮味夾雜清爽，大滿足！
泰式珍多冰
食完濃味嘢飲返杯珍多冰就最正！椰奶味香甜，綠粉條煙韌，冰涼解渴，為呢餐畫上完美句號。
