秋拾米線

營業中

休息中

我叫咗碗招牌魚腐米線，我額外加咗份蘿蔔，秘制酸辣湯，小辣。有啲驚喜呢間舖頭有得揀淮山麵，仲有通心米。淮山麵相比起米線個口感會爽口彈牙，啱晒我呢啲鍾意食餸嘅人，轉左做淮山底之後就好似冇咁滯，可以食多啲餸🤣 個自家製魚腐真係超級好食，佢炸得來，但係又唔會話好油膩，唔會食到骨，啖啖魚肉真係正。蘿蔔都好食，完全冇渣。朋友就叫咗碗炭燒豬頸肉米線，招牌豬骨湯，bb辣，轉做生菜底，另外加咗墨魚丸，酸甜齋同蘿蔔 ，飲品就叫咗一杯特色檸檬益力多。我哋都好鍾意食個豬頸肉，炭燒好惹味，同埋肉質口感嫩滑，真係好食到停唔到口。小食方面，我哋就叫咗一份蝦多士(2件)，腐乳通菜，手拍青瓜同埋紅油拌皮蛋。好鍾意蝦多士，覺得性價比幾高，好難自己喺屋企整，熱辣辣食真係超正，隻蝦係彈牙嘅蝦。手拍青瓜同埋紅油拌皮蛋嘅醬汁辣得來係接受到，真係幾開胃。