陳新記

營業中

休息中

朝早有客來睇廠，老頂諗住個客睇完廠就同佢食飯再摸摸底，挖生意，點知個客唔領情，搞到條預先訂咗嘅生猛石蚌和花蛤無人問津，變咗益咗我哋做o靚嘅去食。未夠十二點，我哋就跟老頂車，飛車去鴨脷洲街熟食市場，嗰度得番一間開檔 (可能係休漁期關係)，中午時間，特別好生意，相比我哋廠就拍晒烏蠅，我哋老頂一片愁容。天氣熱，坐低就整枝樽裝可樂解下暑。然後睇下有咩好食，氹下老頂。先來個招牌菜柱侯牛腩。好腍，不過鹹咗D。另一個招牌菜係三寶，即係炸魚皮、炸魚片頭和炸雲吞。碟頭大非常大，食極都食唔晒。點沙律醬或甜辣汁來食都幾好食。條魚係新鮮石蚌，用嚟清蒸，唔知係咪客人多的關係，舖頭兼顧唔切，蒸得太熟，嘥晒條魚，老頂好唔 happy。再嚟係鹽油水煮花蛤粉絲底，撞鬼! 又係熟過頭，老頂對眼厲住我哋，我哋都唔知講咩好，我哋兩個知“訂”，唯有夾手夾腳隊晒條魚和碟花蛤。最後，驚老頂肚餓，叫番碟肉絲炒麵俾佢頂肚，佢食咗兩啖，大讚好食，佢當堂笑番晒。