龍亭

🐽 煙三文魚沙律三文魚煙燻味夠濃又唔會死鹹，底層沙律菜爽脆仲帶少少柚子汁酸味，幾醒胃🐽 黑松露溫泉蛋用鐵板慢烘到蛋白半熟，篤穿蛋黃撈埋黑松露碎流落去，個種creamy口感同菌香真係夾到痹。🐽 牛油燒海班皮脆肉滑，師傅手勢好收得乾身又鎖住魚油香。大虎蝦啖啖肉彈牙，蝦頭膏多到漏。黑松露帶子煎到外層微焦，入面仲保持溏心質感，配燒鱔個層脆皮夠哂香口，魚肉油脂恰到好處。🐽 澳洲牛柳粒火候掌握得準，外層焦香入面仲keep住粉紅色，肉汁爆出嚟嗰下正，配埋蒜片食更惹味。宮城縣黑豚扒反而有驚喜，肉質比一般豬扒軟嫩得多，燒到邊緣帶少少焦脆🐽 菊花豆腐白麵豉湯刀功了得，豆腐切到髮絲咁幼仲開花狀，個湯底鮮甜唔會過鹹🐽 黑松露海鮮炒飯鑊氣十足，飯粒乾身又粒粒分明，帶子同蝦粒夠新鮮，最尾撒果陣松露碎即刻升呢。整體食材質素對得住價錢，師傅手勢穩陣無失手位。