安金稻拌飯

營業中

休息中

太古城附近除咗名家之外就冇韓國餐廳。最近康怡廣場新開咗間韓國餐廳叫安金稻，一於試一試。餐廳喺康怡廣場地下，鋪面唔係好大， 7:30嚟到已經有人龍。望一望餐牌，驚見最貴嘅餸菜都唔過$50 ，唔怪之得咁多人。等咗大約半個鐘就可以入座，我哋叫咗一份石鍋牛肉醬拌飯，燒汁牛肉鍋同埋石鍋辣牛肉湯。最後發現只要加$8就可以有海帶湯白飯泡菜任食，簡直就係超值。等咗5分鐘之後就上菜啦，每道餸嘅擺盤都唔馬虎，確實增加唔少食慾。講吓食物嘅味道先：石鍋牛肉醬拌飯 $49所有要有嘅配菜都有，佢嘅醬汁係另上，多少自己決定。但欠缺牛肉嘅味道，不過呢個價錢份量嚟講係10分足夠。燒汁牛肉鍋 $46呢味餸係成個鍋上，仲用火慶住，湯汁係偏稠，份量足夠配晒成碗飯，容量都唔少，肉係一般打邊爐嘅肥牛片。石鍋辣牛肉湯呢個牛肉湯味似係五香肉丁濃湯溝水，小辣，牛肉係類似小件牛腩。另外加$8送嘅白飯係日本米，海帶湯係清淡嘅，但係$8係十分之抵加嘅。餐廳環境方面座位係比較逼夾，大家都係快食快走。