天天海南雞飯 (ELEMENTS圓方)

營業中

休息中

早幾日同男朋友去圓方食晚餐，我哋都好鍾意食東南亞菜，就揀咗呢間餐廳食海南雞飯。睇睇餐牌，原來呢間餐廳係米芝蓮推介既新加坡菜，試咗幾款菜式真係有啲驚喜。一定要試嘅梗係天天海南雞$169，我哋叫咗中份，雞肉好嫩滑，雞皮薄到幾乎係冇乜脂肪，我連皮食晒。配埋三款傳統嘅醬，有醬油、薑蓉、同甜辣醬真係冇得頂。我哋仲叫咗黑磨豉醬炆豬軟骨$129，豬軟骨真係大大件好多肉，肉質軟硬適中，磨豉醬鹹鹹地咁，同豬軟骨好夾。除咗豬軟骨，仲有幾件鐵棍淮山，中和下唔會好滯，淮山仲係好健康既食材。唔想淨係食肉，我哋仲叫咗個豆漿海南雜菜煲$109，奶白色嘅豆漿嚟做湯底真係一流，一啲味精都冇，浸住啲雜菜、粉絲，菇🍄、蝦🦐、雞腎、食落好清甜有鮮味。食海南雞點少得叫個油飯🍚，我哋叫咗兩碗油飯，淨係聞味已經好香，食落口真係超正。成餐真係最鍾意佢嘅海南雞同油飯。其他嘢食都好吸引，唯有有機會先再試啦。