新桂香燒臘

營業中

休息中

我今年未到四十，但今日用左超過四十蚊，食左個燒味飯。燒味店並非身處商業區，位於柴灣既住宅區，咁岩lunch經過，於是去買外賣。中午時份，不論堂食定外賣，都幾多人。點左個叉燒燒肉飯，原來$42雙拼送例湯。叉燒燒肉飯+例湯大約5分鐘既路程番到食飯既地方，打開飯盒，盒飯依然燒騰騰。叉燒係我鐘意，無肥膏果隻，厚道適中。再試埋燒肉，啖啖肉加少許肥膏。燒肉既靈魂 - 皮，雖然經過五分鐘路程，但仲係脆皮。燒味飯汁雖然已經幾多，但係部分飯仍未沾到。另一美中不足既地方係唔記得要薑蓉，令今次食既叉燒燒肉飯未能錦上添花。其實一般街坊燒味飯都係$30附近，價錢親民。而呢個開價$42既街坊雙拼飯價錢略高，雖然質素的確好一點，但如果價錢可以回落番$30附近，相信一定更客似雲來。