自家製韓國刀削麵 (山林道)

營業中

休息中

當日係星期日晚，大概8點左右。老公一早bookmark咗好想食呢間餐廳，冇book枱膽粗粗去食。出奇地，間舖得一枱客，我哋以為就收工！原來佢哋係收10點嘅！一坐低店員就準備咗2小碟前菜俾我哋，係辣泡菜。我哋一家四口去食，叫咗3碗刀削麵加一份小食。即叫即整，成個湯麵超滾熱辣！冬天食，真心一流呀！我哋叫咗花蛤刀削麵、牛骨湯刀削麵、雞髀刀削麵及牛肉葱煎餅。麵底方面，好有咬口、彈牙！好食嘅，仲好飽肚！花蛤都幾足料，都有好多隻！雞髀刀削麵真係有大大隻雞髀喺入面，不過略嫌雞髀肉唔夠嫩滑，湯底好鮮甜，都係好正！牛骨湯刀削麵就有幾片好薄嘅牛肉，湯底好正！會想飲晒成碗湯！牛肉葱煎餅好香，少少脆邊，都好好食！下次都會再嚟試埋其他款。