餐廳裝修幾典雅舒適，有返啲傳統粵式酒家嘅feel，唔理係同客傾生意，定係同朋友吹下水都好啱，服務員態度殷勤有禮！👍🏼
🌟十周年限定套餐「黯然銷魂十載情」🌟
今次呢個十周年套餐真係誠意滿瀉，每道菜名都有「十載」，好有意思。🥂
• 《十載･粵點心》🥟
呢道菜係「六姐粉果」同「鮑魚燒賣」，「六姐粉果」據講係源自舊日家廚手藝，外皮爽滑有韌性，內餡飽滿，充滿懷舊風味。「鮑魚燒賣」用料實在，鮑魚有鮮味，燒賣帶有濃濃香菇味，兩款點心各有各精彩，食到停唔到口。
• 《十載･功夫湯》🫖
湯清味鮮，香氣撲鼻，聽講係慢火細煨出嚟嘅。入口溫潤醇鮮，食材精華全部融入湯入面，係嗰種可以暖到入心嘅開胃靚湯。
• 《十載･銷魂飯》🍲
終於到咗主角「黯然銷魂飯」！十年賣咗超過兩萬碗，呢道菜水準依然好高。叉燒肥瘦均勻，一碗用哂一隻豬成條梅頭部位，邊位仲有少少炭火香。一隻完美嘅燶邊太陽蛋，戳穿蛋黃，包住粒粒分明嘅香米，再撈埋香港本地做嘅豉油，每一口都充滿幸福感，真係「銷魂」！
• 《十載･慶甜圓》🌕
「黃金煎堆仔」同「桂花紅豆糕」煎堆仔外皮脆卜卜，入面糯米軟糯香甜熱辣辣，又唔會好滯。桂花紅豆糕桂花香味好清新，配埋紅豆甜度剛好，為呢餐豐盛嘅午宴畫上完美句號。
「黯然銷魂十載情」限定套餐，每位$388（兩位起），四道菜，仲免茶芥同小食（另加一服務費），即日起去到明年3月31號（2月10號至3月3號除外），想去嘅朋友記得提前訂位呀！酒店中菜廳嚟講性價比真係高。可以食到經典嘅黯然銷魂飯，仲有功夫湯同懷舊點心，無論心思同味道都高水準！
今次十周年慶，係致敬經典，又係回饋食客。唔理你係想重溫舊味嘅老顧客，定係想試下新嘢嘅新朋友，呢個套餐都絕對值得一試！
