火鍋本色 (已結業)

今晚同住附近既朋友黎打邊爐，呢間餐廳食正潮流賣精品刺身同靚湯底火鍋，就試試佢既實力。2人前極上刺身拼盤，380蚊，最出色係海膽，有4大片，鮮甜度爆標，仲有象拔蚌刺身，爽口彈牙，同樣令人齒頰留香，正。牡丹蝦好大隻，好甜，刺身大大舊，厚度夠，油甘魚最正，油脂味香，食完飽左一半。湯底是蕃茄牛尾湯拼椰子煲雞 168蚊，椰子煲雞好多椰子，雞肉夠厚肉又鮮味，飲左1碗湯先肯淥野食。牛尾湯比想像更出色，有5到6舊大牛尾，放入蕃茄濃湯味道濃郁，牛尾好淋煮得入味，非常正。火鍋配料叫左牛頸脊，肉質嫩滑，雪花分佈平均，牛脂味香，推介!響鈴即炸好脆，又多又大大舊，淥完3秒就食得，質感非常實在，唔似街市買個d 得淡空氣，吸哂d湯汁非常正。芥蘭苗好爽脆，夠新鮮，不愧是叔最愛既火鍋蔬菜，份量又夠，叫一盤就夠分了。平均每人650蚊，可能眼闊肚窄叫多左，令消費有點高，不過可以食到上等刺身同湯底，就偶爾豪一次吧。