Flames (海濱匯)

營業中

休息中

最近去咗觀塘海濱匯嘅「Flames」食晚飯，一於食下D之前未食過嘅菜式。*此餐廳收取加一服務費。布拉塔芝士香桃車厘茄沙律（單點$168），表面鋪有紅甜菜，布拉搭芝士外層部份採用Mozzarella Cheese製作，口感薄身、軟腍，內層部份採用Stracciatella Cheese、忌廉製作，口感幼滑，呈半液體狀態、帶有少許流心效果，食落奶味醇厚，配以火箭菜、蜜桃、車厘茄、黃芥末、橄欖油食用，味道清爽。燒大蝦三文魚籽龍蝦汁扁意粉（單點$158），表面鋪有芝士碎、番芫碎，大蝦好大隻，肉質爽口，味道鮮甜，三文魚籽食落有鮮味，略嫌龍蝦汁雖然望落好似味道濃郁，但食落比較淡口，扁意粉容易掛汁，內有車厘茄。澳式雞鹽薯條（單點$48），即叫即炸，口感香脆，表面鋪滿澳洲雞鹽、辣椒粉，味道鹹香帶辣，好獨特，配以番茄醬食用，味道更佳。自家製甜品（單點$78），特濃朱古力雜錦果仁塔，表面鋪有朱古力醬，內有夏威夷果仁、杏仁片、花生、朱古力，食落好香口，甜度8.5分，估唔到此甜品為凍食，沒有焗烤加熱，所以略嫌撻皮口感腍身。