芭堤雅泰國餐館

營業中

休息中

元朗呢間泰國菜已經好耐歷史，經過見裝修過門面清雅閑逸，入去坐落整體感覺舒服。兩個人叫咗沙律、菜、包、蠔餅大蝦金柚沙律材料豐富，除咗四大隻鮮蝦同金柚之外，仲有椰絲、腰果、紅蔥頭、蝦米、生菜，蝦肉爽脆有蝦味，柚子好甜，腰果鬆脆，口感豐富，又香又有咬口。蒜蓉包好香又得意，包包已經切開八件，中間插咗一株迷迭香，令到個包都沾染咗香氣，咬落去滿口蒜蓉牛油香，外脆內軟令人停唔到口，中間粒烤蒜頭都唔放過。椰菜苗鮮嫩無老葉，惹味爽脆，唔會成口渣。蠔餅嘅蠔仔好大粒又鮮甜，下面煎雞蛋充滿蛋香，薯粉令蠔餅外圍香脆內裡煙韌，墊底芽菜清爽夾埋蠔餅一齊食仲正，點埋隨附嘅辣椒醬更添風味。呢個甜品擺盤好靚，用泰式奶茶刨成綿密嘅冰，滿有奶茶香味，加上白色嘅係海鹽忌廉，香滑之餘更提味，加埋焦糖脆餅碎落去一齊食，味道與口感更有層次。入坐時可能啱啱開夜市(六點)冇咩人，坐落冇幾耐就已經全場爆滿，走嘅時候仲有人等緊位，睇落都幾受街坊歡迎。