香港老飯店

營業中

休息中

食上海菜，香港都選擇都唔少，但要坐得落一家大細、味道好、菜式選擇多，同埋價錢合理嘅就唔多，我同屋企人就幾鍾意黎老飯店喇。冷盤方面，呢度嘅燻蛋好香煙燻味，糖心蛋黃又煮得恰到好處；沾上芝麻嘅核桃甜甜地好香脆，兩樣野都幾夾呀。蜜味烤雙方都係必食嘅，雲腿唔算肥又唔會太鹹，沾上蜜汁、配埋鬆脆嘅響鈴，俾軟熟嘅薄餅夾住，好好味呀，而且都幾大件架。主菜方面，清炒河蝦仁幾爽甜，唔想道道菜都濃油赤醬，呢個會係清淡d嘅選擇。蔥爆羊肉嘅京蔥好香，份量同羊肉一樣多，羊肉唔「騷」仲好嫩，好惹味呀！百頁紅燒肉嘅肉都唔算太肥又夠腍，但個汁對我哋黎講就鹹咗少少，所以連帶百頁都比較鹹，我哋都係鍾意紅燒元蹄多啲。另外，我哋試咗油泡河鰻球，魚肉好爽，不過自己食唔慣清炒，覺得帶腥。湯類嘅砂鍋小油條材料豐富，有津白、瑤柱、雞肉、火腿、蛋餃、素雞條同粉絲，令湯頭夠晒甜呀！擔擔麵夠多蔥，富花生香，肉臊多同唔肥，麵都幾爽滑，唔係個個食辣嘅我哋，要辣油另上。蔥油大餅都係亮點，外脆內軟之餘唔油膩，蔥落得夠多，好香好好味呀。呢度嘅水準好穩定，希望keep住啦！