火鍋本色 (已結業)

堅尼地城，呢個地方真係好少可黎到。 咁橋今日係呢一頭做嘢， 放工就同同事去周圍搵野食，凍凍地打邊爐就最啱。呢一間嘢裝修幾有特色， 環境一流。 叫左個白芷川芎天麻魚頭尾窩， 聽老人家講呢一個湯可以止頭痛。另外仲叫咗雲吞、同埋鯇魚片等等。 個湯底配料十分足，入面有唔同嘅藥材，包括淮山、 杞子、 紅棗等等，仲有條魚係入面煲緊，十分香濃， 忍唔住飲下幾啖湯底試下，味道有少少苦甘之餘， 好有魚嘅鮮味 ，齋飲嘅湯都好得。 要讚下佢個蝦丸 ，十分之彈牙， 真係可以當咗乒乓波咁打。 佢呢一度啲嘢 特色係其實好大份， 肉就好厚切，雖然價錢有番咁上下， 但係性價比真係高，最後要讚下佢嗰搾意米水 ，唔會好似其他地方咁溝到稀哂， 個底仲有好多惹米，真係真材實料。