嚐粵樓小館

營業中

休息中

由細到大屋企都食開中菜，自問對中菜都好有要求，呢間真係好食到我要寫出嚟！首先上個杏汁花膠白肺湯，我唔鍾意杏仁味嘅人都覺得好好飲，一大盅湯有半盅都係花膠湯料，真材實料無得呃，配埋佢嘅秘制豉油同辣油點湯渣，真係冇得輸。小炒皇滿滿鑊氣，入面個炸芋條真係好好食，忍唔住另外嗌多個甜蜜脆芋絲，桂花蜜好香，唔係求其加糖漿！椒鹽九肚魚零腥味又夠滑，椒鹽味突出，明顯大廚處理食材有用心。鐘意食海鮮嘅我就叫咗蒜蓉粉絲蟶子同埋甜桃香芒蝦球。蟶子手掌咁長，大大隻好滿足。甜桃香芒蝦球真係必食推介！呢個菜喺逐位逐份計嘅！薄薄炸漿包住彈牙大蝦，再配香芒粒，好開胃！重點係配埋炸蝦頭！係高級日本料理質素嘅炸蝦頭！單單喺呢個菜我一定會再返嚟幫襯！最後食埋甜品芝麻卷，香滑得嚟唔怕甜，成餐飯完滿晒。下次再試隔離枱order嘅走地白切雞同龍蝦，好期待下次試唔同心機菜。