天天海南雞飯 (ELEMENTS圓方)

營業中

休息中

咁岩今日喺九龍站附近收工，梗係去圓方睇吓有咩好嘢食。唔知係咪時間尚早行過見到天天海南雞冇咩人，咁就入去睇吓有咩啱食啦！佢個餐牌成本雜誌咁圖文並茂，睇見都想食。但係得兩個胃，梗係要嗌新加坡菜最出名嘅海南雞同埋喇沙試試佢。海南雞佢有兩款，一款叫正宗海南雞另一款叫天天海南雞。見正宗嗰款價錢貴啲，就叫返個試試睇吓有幾正宗。食海南雞雖然係油飯正宗啲，但係今日想食得清淡啲都係叫個白飯兩個人share。佢個海南雞除咗有三個常見嘅醬料之外，仲有一個用壺仔裝住嘅汁，試咗先知原來係雞汁嚟。加埋落去可以幫個雞提鮮，另外再加少少青檸汁又係別有一番風味，呢個正宗海南雞真係值得推介。另外個海鮮喇沙水晶粉都做得唔錯，椰香味濃，又有唔少海鮮，有蝦、青口、魷魚⋯。都係值得一試。個雜菜煲就大大個，有蝦乾、雜菇配粉絲，味道偏清淡，中和返啲濃味野就啱啱好。