大丸ラーメン

營業中

休息中

今日行開大角咀，意外地發現呢一間好食拉麵店。開頭我哋都冇諗住試呢一間餐廳，不過行吓行吓都睇唔啱其他餐廳，又見到尼間餐廳出面時不時都會有人排隊，所以決定返轉頭一試呢一間日式拉麵小店！我哋好好彩返轉頭嘅時候唔使排隊有得直接入去。由於店裏面得10至12個位，所以如果想來試下拉麵嘅朋友記得要留返少少時間排隊。我地叫左一碗蝦丸、一碗大丸特製蝦味拌面同埋一份關西風煎餃子。蝦丸 有好多櫻花蝦，蝦味湯底好夠味，上碗時湯底及面底都好夠熱，好味道！大丸特製蝦味拌面 有驚喜！ 開頭見到枱枱都係叫熱拉麵，但由於天氣太熱所以我就想試一試呢一個拌麵。尼個蝦味拌面既味道一啲都唔輸比蝦丸，配埋溫泉蛋、蔥花同埋櫻花蝦 入口既味道都一流！由於我係餃子控既關係，見到餐廳有賣餃子，我一定會想試一試。尼個關西風餃子 食落去有大阪燒既味道，餃子肉多汁，不錯不錯！ 最後，值得一讚係呢一間餐廳嘅侍應同安排都好細心。如果見到食客着白色衫或者有長頭髮，佢哋都會主動提供圍裙或者橡筋，以防大家整污糟。