老鍋台式火鍋 (京都廣場) (已結業)

大半年冇搭過飛機，為咗一解鄉愁，今晚就約咗個偽同鄉去食台式火鍋。台式火鍋嘅湯底同港式火鍋唔同，比較注重養生，所以我同朋友二話不說就揀咗呢個美人鍋，補補骨膠原。我覺得呢個湯底真係夠晒滋補，因為佢係有原隻烏雞放咗落去個湯度，淨係咁都已經值回票價啦！調味吧擺放得非常整齊，而且保持清潔，令人食得更放心。打邊爐嘅最佳伴侶當然就係牛肉啦，我哋就揀咗呢個手切安格斯牛小排，佢嘅雪花紋真係分布得非常平均，所以每一片入口都非常之嫩滑，而且好有牛味。響鈴係一樣明知冇益但係又忍唔住要食嘅火鍋配料，所以就少少哋叫半份開心share吓，呢度嘅響鈴新鮮脆口，食落就冇乜油膩嘅感覺，所以都冇咁有罪疚感。我就最鍾意食佢嘅墨魚滑，呢度仲有黑白兩款墨魚滑，有得雙拼，正！呢個井字拼盤好啱我哋二人份量，分別有蝦丸、魚肉小湯包、鮮蝦雲吞同魚皮餃各兩粒，可以一次過試幾款配料。鍾意食台式火鍋都係因為鍾意食鴨血，雖然冇揀麻辣湯底，不過鴨血配呢個湯底都唔錯。揀咗個餐前小食要咗台式蒜香腸，估唔到個份量有咁多，多到我哋都食唔晒。呢個台灣麵好正，凍食又得，放湯又得，兩種食法各有特色。配埋杯冰凍冬瓜茶，真係令自己好似置身喺台灣食緊台式火鍋咁呀！